അസീം താന്നിമൂട്

Azeem Thannimoodu]

Azeem Thannimoodu]

അസീം താന്നിമൂട്
തൂലികാ നാമം	അസീം താന്നീമൂട്
തൊഴിൽ	പത്രലേഖകൻ,ദേശാഭിമാനി
ദേശീയത	ഇന്ത്യ
Genre	കവിത, ലേഖനം
പങ്കാളി	അസീസ അസീം
കുട്ടികൾ	2

കേരളീയനായ ഒരു കവിയാണ് അസീം താന്നിമൂട്. തിരുവനന്തപുരം ജില്ലയിലെ നെടുമങ്ങാടിനു സമീപം താന്നിമൂട് ഗ്രാമത്തിൽ ഇ അബ്ദുൽ റഹുമാൻറെയും എസ് സഫിയാ ബീവിയുടെയും മകനായി ജനിച്ചു. മാതൃഭൂമി ബാലപംക്തിയിലൂടെയാണ് കാവ്യരംഗത്തു സജീവമായത്. മുഖ്യധാര,സമാന്തര,ഓൺലൈൻ മാഗസിനുകളിൽ കവിതകളും റിവ്യൂകളും അനുഭവക്കുറിപ്പുകളും എഴുതുന്നു. ആദ്യ സമാഹാരം 'കാണാതായ വാക്കുകൾ' ഡി.സി ബുക്സ് പ്രസിദ്ധീകരിച്ചു. രണ്ടാം സമാഹാരം 'മരത്തിനെ തിരിച്ചു വിളിക്കുന്ന വിത്ത്' ഡി.സി ബുക്സ് ആണ് പ്രസിദ്ധീകരിച്ചത്.അന്നുകണ്ട കിളിയുടെ മട്ട്-കവിതാസമാഹാരം (ഡി സി ബുക്സ്)മിണ്ടിയും മിണ്ടാതെയും-ഉപന്യാസ സമാഹാരം (മൈത്രി ബുക്സ്) എന്നീ പുസ്തകങ്ങളും പ്രസിദ്ധീകരിച്ചിട്ടുണ്ട്.

പ്രധാന പദവികൾ

ജില്ലാ റൂറൽ പ്രസ്‍ക്ലബ്ബ് സെക്രട്ടറി, പ്രസിഡന്റ്, കവന കൗമുദി പത്രാധിപ സമിതി അംഗം, പുരോഗമന കലാ സാഹിത്യ സംഘം ജില്ലാ കമ്മിറ്റി അംഗം എന്നീ നിലകളിൽ പ്രവർത്തിച്ചിട്ടുണ്ട്. ഇപ്പോൾ ദേശാഭിമാനി ദിനപത്രം നെടുമങ്ങാട് പ്രാദേശിക ലേഖകനായി ജോലി ചെയ്യുന്നു.

പുരസ്കാരങ്ങൾ

2021 വർഷത്തെ മൂലൂർ സ്മാരക പുരസ്കാരം, അബുദാബി ശക്തി അവാർഡ്, 2022ലെ ഡോ.നെല്ലിക്കൽ മുരളീധരൻ സ്മാരക അവാർഡ് എന്നിവ `മരത്തിനെ തിരിച്ചു വിളിക്കുന്ന വിത്ത്' എന്ന സമാഹാരത്തിനും വൈലോപ്പിള്ളി പുരസ്കാരം, വി ടി കുമാരൻ മാസ്റ്റർ പുരസ്കാരം, വൈക്കം മുഹമ്മദ് ബഷീർ സ്മാരക പുരസ്കാരം, തിരുനെല്ലൂർ കരുണാകരൻ പുരസ്കാരം, മൂടാടി ദാമോദരൻ സ്മാരക പുരസ്കാരം, അനിയാവ സാഹിത്യ പുരസ്കാരം, യുവ സാഹിത്യ പുരസ്കാരം, കന്യാകുമാരി മലയാള സമാജം പുരസ്കാരം  തുടങ്ങി പത്തോളം പുരസ്കാരങ്ങൾ ആദ്യ സമാഹാരമായ കാണാതായ വാക്കുകൾക്കും ലഭിച്ചു. മരത്തിനെ തിരിച്ചു വിളിക്കുന്ന വിത്തിന് ഉള്ളൂർ സ്മാരക പുരസ്കാരം(2023) പൂർണ്ണ- ആർ രാമചന്ദ്രൻ സ്മാരക പുരസ്കാരം.(2023) അന്നുകണ്ട കിളിയുടെ മട്ടിന് ചാത്തന്നൂർ മോഹൻ സ്മാരക പുരസ്കാരം(2023) ബി സി വി സ്മാരക പുരസ്കാരം(2024) എന്നിവ ലഭിച്ചിട്ടുണ്ട്.കേന്ദ്ര സാഹിത്യ അക്കാദമിയുടെ Anthology of poems in Malayalam(1980-2010) ഗ്രന്ഥത്തിലും 21st Century Malayalam Poetry Supplementary Special Section-നിലും പോണ്ടിച്ചേരി സർവകലാശാല, കേരള സർവകലാശാല, കണ്ണൂർ യൂണിവേഴ്സിറ്റി സിലബസുകളിലും കവിതകൾ ഉൾപ്പെടുത്തിയിട്ടുണ്ട്. 2021ലെ കൃത്യ ഇന്റർ നാഷണൽ പൊയട്രി ഫെസ്റ്റിവെലിൽ മലയാള കവിതയെ പ്രതിനിധീകരിച്ചു.