എ ഹിസ്റ്ററി ഓഫ് വെസ്റ്റേൺ ഫിലോസഫി
സോക്രട്ടീസിനു മുൻപ് തുടങ്ങി ഇരുപതാം നൂറ്റാണ്ടു വരെയുള്ള പാശ്ചാത്യ തത്ത്വചിന്തയുടെ അവലോകനമായി, പ്രഖ്യാതചിന്തകൻ ബെർട്രാൻഡ് റസ്സൽ രചിച്ച് 1945-ൽ പ്രസിദ്ധീകരിച്ച ഗ്രന്ഥമാണ്‌ എ ഹിസ്റ്ററി ഓഫ് വെസ്റ്റേൺ ഫിലോസഫി (പാശ്ചാത്യതത്ത്വചിന്തയുടെ ചരിത്രം).[1]സാമാന്യവൽക്കരണങ്ങളുടേയും ദെക്കാർത്തിനു ശേഷമുള്ള ചിന്തകന്മാരോടു കാട്ടിയ അവഗണനയുടേയും പേരിൽ വിമർശിക്കപ്പെട്ടപ്പോഴും ഏറെ ജനസമ്മതി നേടിയ ഈ കൃതി, ഒരു വൻപ്രസാധന വിജയമായിരുന്നു. ആദ്യപ്രസിദ്ധീകരണത്തിനു ശേഷം അതിന്റെ പുതിയ പതിപ്പുകൾക്കുള്ള ആവശ്യം മുടങ്ങിയിട്ടില്ല. 1950-ൽ റസ്സലിന്‌ നോബൽ സമ്മാനം നൽകിയപ്പോൾ, അതിനുള്ള കാരണങ്ങളിലൊന്നായി ഈ പുസ്തകവും പരാമർശിക്കപ്പെട്ടിരുന്നു. റസ്സലിന്‌ ജീവിതത്തിന്റെ അവസാനഘട്ടത്തിൽ സാമ്പത്തിക സുരക്ഷിതത്ത്വം ഉറപ്പാക്കാൻ ഈ ഗ്രന്ഥം സഹായിച്ചു.
പശ്ചാത്തലം
[തിരുത്തുക]1941-ലും 1942-ലുമായി ഫിലഡെൽഫിയയിലെ ബാൺസ് സംസ്ഥാപനത്തിൽ നടത്തിയ ഒരു പ്രഭാഷണപരമ്പരയെ ആശ്രയിച്ച് രണ്ടാം ലോകമഹായുദ്ധകാലത്താണ്‌ റസ്സൽ ഈ കൃതി എഴുതിയത്. [2] പുസ്തകത്തിനു വേണ്ടിയുള്ള ചരിത്രഗവേഷണത്തിന്റെ വലിയൊരുഭാഗം നടത്തിയത് റസ്സലിന്റെ മൂന്നാം ഭാര്യ പട്രീഷ്യാ സ്പെൻസ് ആയിരുന്നു. 1943-ൽ പ്രസാധകന്മാരിൽ നിന്ന് മുൻ‌കൂറായി 3000 ഡോളർ വാങ്ങിയ റസ്സൽ, 1943-44 കാലത്ത് പെൻസിൽ‌വാനിയയിലെ ബ്രിൺ മാവ്ര് കോളേജിൽ താമസിച്ചുകൊണ്ടാണ്‌ ഗ്രന്ഥരചന നടത്തിയത്. അമേരിക്കൻ ഐക്യനാടുകളിൽ 1945-ലും അടുത്ത വർഷം ബ്രിട്ടണിലും പുസ്തകം പ്രസിദ്ധീകരിച്ചു.
ഉള്ളടക്കം
[തിരുത്തുക]മൂന്നു ഭാഗങ്ങളായി തിരിച്ചിരിക്കുന്ന ഈ കൃതിയുടെ ഓരോ ഭാഗവും വ്യത്യസ്ത ചിന്തകന്മാർക്കോ, ചിന്താസരണികൾക്കോ, കാലഘട്ടങ്ങൾക്കോ വേണ്ടിയുള്ള അദ്ധ്യായങ്ങളായി തിരിച്ചിരിക്കുന്നു.
പുരാതനതത്ത്വചിന്ത
[തിരുത്തുക]- സോക്രട്ടീസിനു മുൻപുണ്ടായിരുന്ന ഥേൽസ്, പൈത്തഗോറസ്, ഹെരാക്ലിറ്റസ്, പാർമനിഡ്സ്, എമ്പെഡോക്കിൾസ്, അനക്സഗോറസ്, പ്രോട്ടഗോറസ്
- സോക്രട്ടീസ്, പ്ലേറ്റോ, അരിസ്റ്റോട്ടിൽ
- അരിസ്റ്റോട്ടിലിനു ശേഷം വന്ന സിനിക്കുകൾ, സ്കെപ്റ്റിക്കുകൾ, എപ്പിക്ക്യൂറിയന്മാർ, സ്റ്റോയിക്കുകൾ, പ്ലോട്ടിനസിനെപ്പോലുള്ള നവപ്ലേറ്റോണിസ്റ്റുകൾ
തുടങ്ങിയവരുടെ ചിന്തകളാണ്‌ ഗ്രന്ഥത്തിന്റെ ഈ ഭാഗത്ത് പരിഗണിക്കപ്പെടുന്നത്.
കത്തോലിക്കാ തത്ത്വചിന്ത
[തിരുത്തുക]- ആദ്യകാല *ക്രിസ്തീയ സഭാപിതാക്കന്മാരായ അംബ്രോസ്, ജെറോം, ഹിപ്പോയിലെ അഗസ്റ്റിൻ, നർസിയായിലെ ബെനഡിക്ട്, ഗ്രിഗോറിയോസ് ഒന്നാമൻ മാർപ്പാപ്പ എന്നിവരും;
- ജോൺ സ്കോട്ടസ് എറിയുജീന, തോമസ് അക്വീനാസ് തുടങ്ങിയ സ്കൊളാസ്റ്റിക് ചിന്തകന്മാരും ആണ്‌ ഇവിടെ പരിഗണിക്കപ്പെടുന്നത്.
യഹൂദ, ഇസ്ലാമിക ചിന്തകളും ഈ ഭാഗത്ത് ചർച്ച ചെയ്യപ്പെടുന്നുണ്ട്.
ആധുനികചിന്ത
[തിരുത്തുക]- നവോത്ഥാനം മുതൽ ഡേവിഡ് ഹ്യൂം വരെയുള്ള ചിന്തകന്മാരിലാണ്‌ ഈ ഭാഗത്തിന്റെ തുടക്കം: മാക്കിയവെല്ലി, ഇറാസ്മസ്, തോമസ് മൂർ, ഫ്രാൻസിസ് ബേക്കൺ, തോമസ് ഹോബ്സ്, ദെക്കാർത്ത്, ബാരൂക്ക് സ്പിനോസ, ലീബ്നീസ്, ജോൺ ലോക്ക്, ജോർജ്ജ് ബെർക്ക്‌ലി, ഡേവിഡ് ഹ്യൂം തുടങ്ങിയ ചിന്തകന്മാരാണ്‌ ആദ്യം ചർച്ച ചെയ്യപ്പെടുന്നത്.
- റുസ്സോ മുതൽ ഇങ്ങോട്ട്: റുസ്സോ, ഇമ്മാനുവേൽ കാന്റ്, ഹേഗൽ, ബൈറൺ, ആർതർ ഷോപ്പൻഹോവർ, ഫ്രീഡ്രിക്ക് നീച്ച, പ്രയോജനവാദികൾ, കാറൽ മാർക്സ്, ബെർഗ്സൺ, വില്യം ജെയിംസ്, ജോൺ ഡൂവി എന്നിവരെക്കുറിച്ചുള്ള ചർച്ചയാണിവിടെ
- "ലോജിക്കൽ വിശകലനത്തിന്റെ ദർശനം" (Philosophy of Logical Analysis) എന്ന അവസാന അദ്ധ്യായം അക്കാലത്തെ റസ്സലിന്റെ തന്നെ ദാർശനിക നിലപാടുകളുടെ സംഗ്രഹമാണ്‌.