തിലാപ്പിയ

തിലാപ്പിയ
	തിലാപ്പിയ
Scientific classification
കിങ്ഡം:	Animalia
Phylum:	Chordata
Class:	Actinopterygii
Order:	Perciformes
Family:	Cichlidae
Subfamily:	Pseudocrenilabrinae
Tribe:	Tilapiini
Genera
	Oreochromis (about 30 species); Sarotherodon (over 10 species); Tilapia (about 40 species); and see text

ഇംഗ്ലീഷ് വിലാസം

https://ml.wikipedia.org/wiki/Tilapia

പോഷക സമൃദ്ധമായ ഒരു പ്രധാനപ്പെട്ട വളർത്തുമത്സ്യമാണ് തിലാപ്പിയ (Tilapia). കേരളത്തിൽ ചിലയിടങ്ങളിൽ പിലോപ്പി, സിലോപ്യ എന്ന പേരിലും അറിയപ്പെടുന്നു. ഇരുപത്തൊന്നാം നൂറ്റാണ്ടിലെ ‘അക്വാ ചിക്കൻ’ എന്നറിയപ്പെടുന്ന ‘ഗിഫ്റ്റ്’ തിലാപ്പിയ ഇതിന്റെ ഒരു സങ്കരയിനമാണ്. ഇത് പെഴ്സിഫോമെസ് മത്സ്യഗോത്രത്തിലെ സിക്ലിഡേ കുടുംബത്തിൽപ്പെടുന്നു. ഇതിന്റെ ശാസ്ത്രീയനാമം തിലാപ്പിയ മൊസാമ്പിക്ക എന്നാണ്. കിഴക്കൻ ആഫ്രിക്കയാണ് ഇവയുടെ ജന്മദേശമെന്നു കരുതപ്പെടുന്നു. ഈ മത്സ്യത്തെ ലോകമെമ്പാടുമുള്ള അനേകം രാജ്യങ്ങളിൽ കാണാൻ കഴിയും. ലോകത്തിൽ തന്നെ ഏറ്റവുമധികം കൃഷി ചെയ്യുന്ന മീനുകളിൽ ഒന്നാണ് ഇവ. ലവണ ജലാശയങ്ങളിലും ശുദ്ധജല തടാകങ്ങളിലും നെൽവയലുകളിലും കുളങ്ങളിലും തിലാപ്പിയകളെ വളർത്തുന്നുണ്ട്. ഡാമുകളിലും പുഴകളിലും കാനലുകളിലും മറ്റും ഇവയെ കാണാം. കേരളത്തിലും ഈ മത്സ്യം സർവ്വ സാധാരണമാണ്. പാലക്കാട്‌ ജില്ലയിലെ മലമ്പുഴ ഡാമിൽ തിലാപ്പിയ മത്സ്യങ്ങൾ കാണാപ്പെടുന്നു.

ജലത്തിലെ ശൈവാലങ്ങൾ, ചെറുസസ്യങ്ങൾ, പായൽ എന്നിവയാണ് ഇവയുടെ മുഖ്യമായ ആഹാരം. പൊതുവേ ഇവ മറ്റു മത്സ്യങ്ങളെ ആഹാരമാക്കാറില്ല. എന്നാൽ വാകവരാൽ, വരാൽ, കാളാഞ്ചി തുടങ്ങിയ മത്സ്യങ്ങൾ തിലാപ്പിയയെ ഭക്ഷണമാക്കാറുണ്ട്.

മനുഷ്യരിലെ പോഷകാഹാരക്കുറവ് പരിഹരിക്കാനാണ് ഇവയെ വികസിപ്പിച്ചെടുത്തത്. ലോകത്തിന്റെ ഭക്ഷ്യസുരക്ഷയ്ക്കും, പ്രത്യേകിച്ച് വർദ്ധിച്ച് വരുന്ന ജനസംഖ്യയുടെ എളുപ്പം ലഭ്യമായ പ്രോട്ടീ‍ൻ സ്രോതസ്സായി കണക്കാക്കപ്പെടുന്ന ഒരു പ്രധാനപ്പെട്ട മത്സ്യമാണ് ഇവ.

വ്യത്യസ്ത സാഹചര്യത്തിൽ വളരുന്ന ഇവ അക്വപോണിക്സ്, ബയോഫ്‌ളെക്‌സ്‌ തുടങ്ങിയ രീതിയിലുമൊക്കെ വളർത്തിയെടുക്കാവുന്നതാണ്. വീടുകളിൽ ശാസ്ത്രീയമായ രീതിയിൽ നിർദിഷ്ട വലുപ്പത്തിലുള്ള ടാങ്ക് സ്ഥാപിച്ചോ ചെറിയ കുളങ്ങളിലൊ ഇവയെ വളർത്താവുന്നതാണ്.

പ്രോടീൻ അഥവാ മാംസ്യം, വിറ്റാമിൻ ബി ജീവകങ്ങൾ, വിറ്റാമിൻ ഡി തുടങ്ങിയ ജീവകങ്ങൾ, മഗ്നീഷ്യം തുടങ്ങിയ ധാതുക്കൾ എന്നി പ്രധാനപ്പെട്ട പോഷകങ്ങളാൽ സമൃദ്ധമാണ് തിലാപ്പിയ. ഇതിൽ കൊഴുപ്പിന്റെ അളവ് വളരെ കുറവാണ്. അതിനാൽ തികച്ചും ആരോഗ്യകരമായ ഒരു മത്സ്യമാണ് തിലാപ്പിയ എന്ന്‌ പറയാം. സാൽമൺ പോലെ ഒമേഗ-3 ഫാറ്റി ആസിഡുകൾ ധാരാളമായി തിലാപ്പിയയിൽ അടങ്ങിയിട്ടില്ലെങ്കിലും, അതിൽ മിതമായ അളവിൽ അടങ്ങിയിട്ടുണ്ട്. ഒമേഗ-3 ഫാറ്റി ആസിഡുകൾ ഹൃദയാരോഗ്യത്തിനും വീക്കം കുറയ്ക്കുന്നതിനും തലച്ചോറിന്റെ ശരിയായ പ്രവർത്തനത്തിനും പിന്തുണയ്ക്കുന്നതിനും ഗുണകരമാണ്.

ഇനങ്ങൾ

ആഫ്രിക്കയിൽ തിലാപ്പിയ മൊസാമ്പിക്ക, തിലാപ്പിയ നൈലോട്ടിക്ക, തിലാപ്പിയ ഗലീലിയ എന്നിങ്ങനെ മൂന്നിനം തിലാപ്പിയകളുണ്ട്. 19-ാം ശതകത്തിൽ ജാവ, ഇന്തോനേഷ്യ എന്നിവിടങ്ങളിൽ തിലാപ്പിയയെ വളർത്താൻ തുടങ്ങി. ജാവയിൽ നിന്ന് മലയ, ഫിലിപ്പീൻസ്, തായ്‌ലന്റ്, ശ്രീലങ്ക എന്നിവിടങ്ങളിലേക്ക് ഇവയുടെ കുഞ്ഞുങ്ങളെ കൊണ്ടുപോയി കൃഷിയാരംഭിച്ചു. 1952-ൽ തായ്ലൻഡിൽ നിന്നാണ് തിലാപ്പിയയെ ഇന്ത്യയിലെ കേന്ദ്രസർക്കാർ മത്സ്യ ഗവേഷണ സ്ഥാപനത്തിലേക്കു കൊണ്ടുവന്നത്. വളരെച്ചുരുങ്ങിയ കാലം കൊണ്ട് ഇന്ത്യയിലുടനീളം, പ്രത്യേകിച്ച് കേരളത്തിൽ വൻപ്രചാരം നേടാൻ ഈ വിദേശ മത്സ്യത്തിനു കഴിഞ്ഞു. ഏതു സാഹചര്യത്തിലും വളരാനുള്ള കരുത്തും അതിവേഗം മുട്ടയിട്ടു പെരുകാനുള്ള ശേഷിയും ഉള്ള ഇനമായതിനാൽ ഇന്ന് പലയിടങ്ങളിലേയും ജലാശയങ്ങളിൽ ഈ മത്സ്യം കൃഷിചെയ്തു വരുന്നു. റെഡ് തിലാപ്പിയ, ഗിഫ്റ്റ് തുടങ്ങിയവ വിവിധ ഇനങ്ങളാണ്.

ഗിഫ്റ്റ്

ഇരുപത്തൊന്നാം നൂറ്റാണ്ടിലെ ‘അക്വാ ചിക്കൻ’ എന്നറിയപ്പെടുന്ന ‘ഗിഫ്റ്റ്’ തിലാപ്പിയ ഇതിന്റെ അത്യുത്പാദനശേഷിയുള്ള ഒരു സങ്കരയിനം തിലാപ്പിയ മത്സ്യമാണ്. ഉയർന്ന തീറ്റ പരിവർത്തന ശേഷി രേഖപ്പെടുത്തിയിട്ടുള്ള ഗിഫ്റ്റ് തിലാപ്പിയ പ്രോട്ടീൻ കുറഞ്ഞ തീറ്റ കഴിച്ചും നല്ല വളർച്ച കാണിക്കുന്നതാണ്.

നൈൽ തിലാപ്പിയ മത്സ്യങ്ങളിൽ നിന്നും വികസിപ്പിച്ചെടുത്ത മത്സ്യയിനമാണ് ഗിഫ്റ്റ് (GIFT-Genetically Improved Farmed Tilapia). ഇന്ത്യയിലെ ഗിഫ്റ്റ് തിലാപ്പിയ വികസിപ്പിച്ചെടുത്ത സമുദ്രോൽപ്പന്ന കയറ്റുമതി വികസന ഏജൻസിയുടെ ജലകൃഷി ഗവേഷണ വികസന സ്ഥാപനമായ രാജീവ്ഗാന്ധി സെന്റർ ഫോർ അക്വാകൾച്ചറിന്റെ വിജയവാഡയിലുള്ള കേന്ദ്രത്തിലാണ് ഗിഫ്റ്റ് മത്സ്യം വികസിപ്പിച്ചെടുത്തത്. നൈൽ തിലാപ്പിയകളിൽ നിന്നും ജനിതക രീതികളവലംബിച്ചു വികസിപ്പിച്ച മത്സ്യമാണിത്.

ഇന്ത്യയിലെ സാഹചര്യങ്ങളിൽ നന്നായി വളരുന്ന ഗിഫ്റ്റ് തിലാപ്പിയ രുചികരവും പോക്ഷക സമൃദ്ധവുമാണ്. ഉയർന്ന രോഗപ്രതിരോധശേഷി, ഏതു കാലവസ്ഥയിലും ജീവിക്കാനുള്ള കഴിവ്, മിശ്രഭുക്ക് തുടങ്ങിയ ഗുണങ്ങളാണ് ഇവയെ ആകർഷകമായ മത്സ്യം ആക്കിയത്. 6 മാസം കൊണ്ട് 800 ഗ്രാം വരെ തൂക്കം വയ്ക്കാൻ ഈ ഇവയ്ക്ക് സാധിക്കുന്നു. ഈ മത്സ്യം ചെറിയ ചെടികളേയും പായലുകളെയും പ്രാണികളെയും ഭക്ഷണമാക്കുന്നു. സാധാരണ ഗതിയിൽ ഇവ മറ്റു ചെറു മത്സ്യങ്ങളെ ആഹാരമാക്കാറില്ല.

ശരീരഘടന

തിലാപ്പിയ മൊസാമ്പിക്ക 36 സെന്റിമീറ്റർ വരെ നീളത്തിൽ വളരും. തിലാപ്പിയ ഗലീലിയ 43 സെന്റിമീറ്ററിലധികവും തിലാപ്പിയ നൈലോട്ടിക്ക 53 സെന്റിമീറ്ററിലധികവും നീളം വയ്ക്കുന്നവയാണ്. തിലാപ്പിയ മത്സ്യത്തിന്റെ പാർശ്വഭാഗം പരന്ന് ദീർഘ വൃത്താകൃതിയിലാണ്. മോന്ത ഉരുണ്ടിരിക്കും. ചെതുമ്പലുകൾ ചെറുതും ക്രമത്തിൽ അടുക്കിയിട്ടുള്ളതുമാണ്. രണ്ടു പാർശ്വരേഖകളുണ്ട്; ആദ്യത്തേത് ചെകിള ഭാഗത്തുനിന്നു തുടങ്ങി ശരീരത്തിന്റെ പകുതിയോളമെത്തി അവസാനിക്കുന്നു; രണ്ടാമത്തേത് ആദ്യത്തെ പാർശ്വരേഖ അവസാനിക്കുന്നതിന്റെ താഴെ നിന്നു തുടങ്ങി വാൽ വരെയെത്തുന്നു. മുതുച്ചിറകിൽ 17-ഉം, ഗുദച്ചിറകിൽ മൂന്നും, പിൻ പാർശ്വച്ചിറകിൽ ഒന്നും വീതം മൂർച്ചയുള്ള മുള്ളുകളുണ്ടായിരിക്കും. ഗിഫ്റ്റ് തിലാപ്പിയ 6 മാസം കൊണ്ട് 800 ഗ്രാം വരെ ഭാരം വയ്ക്കുന്നു.

മാംസഘടന, പോഷകങ്ങൾ

തിലാപ്പിയയുടെ മാംസത്തിൽ 14-19 ശതമാനം മാംസ്യവും, 76-83 ശതമാനം ജലാംശവും, 2 ശതമാനം കൊഴുപ്പും 4-11 മില്ലിഗ്രാം ഇരുമ്പും ഫോസ്ഫറസും കാത്സ്യവും അടങ്ങിയിരിക്കുന്നു. ഇത് തികച്ചും ആരോഗ്യകരവും പോഷക സമൃദ്ധവുമായ ഒരു മത്സ്യമാണ്. കൊഴുപ്പിന്റെ അളവ് ഇതിൽ തീരെ കുറവാണ്. തിലാപ്പിയയിൽ മിതമായ അളവിൽ ഒമേഗ-3 ഫാറ്റി ആസിഡുകൾ അടങ്ങിയിട്ടുണ്ട്. ഇത് ഹൃദയാരോഗ്യത്തിനും വീക്കം കുറയ്ക്കുന്നതിനും തലച്ചോറിന്റെ ശരിയായ പ്രവർത്തനത്തിനും ആവശ്യമാണ്.

USDA കണക്കുകൾ പ്രകാരം 100 ഗ്രാം വേവിച്ച തിലാപ്പിയയിൽ അടങ്ങിയിരിക്കുന്ന പോഷകങ്ങൾ താഴെ കൊടുക്കുന്നു. ദിവസേന ആവശ്യമുള്ളതിന്റെ ശതമാനക്കണക്ക് (% Daily value) കൂടി കൊടുത്തിരിക്കുന്നു.

കാലറി/ഊർജം - 129

മൊത്തം കൊഴുപ്പ് - 2.7 g (4%)

പൂരിത കൊഴുപ്പ് - 0.9 g (4%)

സോഡിയം - 56 mg (2%)

പൊട്ടാസ്യം - 380 mg (10%)

പ്രോടീൻ/ മാംസ്യം - 26 g (52%)

അയൺ/ ഇരുമ്പ് - 3%

വിറ്റാമിൻ ബി6 - 5%

മഗ്‌നീഷ്യം - 8%

കാൽസ്യം - 1%

വിറ്റാമിൻ ഡി - 37%

കൊബലമിൻ - 31%

നിറഭേദങ്ങൾ

വളരുന്ന സാഹചര്യങ്ങൾക്കനുസരിച്ച് തിലാപ്പിയയുടെ ശരീരത്തിന്റെ നിറത്തിനും മാറ്റമുണ്ടാകും. ഇവയ്ക്ക് കറുപ്പോ തവിട്ടോ ചാരം കലർന്ന ഒലിവു നിറമോ ആണ്. മുൻ പാർശ്വച്ചിറകും വാൽച്ചിറകും കറുപ്പുനിറവും മുതുച്ചിറകിന്റേയും വാൽച്ചിറകിന്റേയും അറ്റത്തിന് മഞ്ഞ നിറവും ആണ്. പ്രജനന കാലത്ത് ആൺ പെൺ മത്സ്യങ്ങളിൽ വർണഭേദം പ്രകടമാണ്. പെൺ മത്സ്യത്തിന് ചാരനിറമുള്ള ശരീരത്തിൽ കറുത്ത പുള്ളികൾ ഉണ്ടായിരിക്കും. ആൺ മത്സ്യത്തിന്റെ ശരീരം കറുപ്പു നിറവും, വായയുടെ കീഴ്ഭാഗം മാത്രം വെളുത്ത നിറവുമായിരിക്കും. ആൺ മത്സ്യത്തിന്റെ മുൻ പാർശ്വച്ചിറകുകളുടേയും വാൽച്ചിറകുകളുടേയും അരികുകൾക്ക് ചുവപ്പു നിറമായിരിക്കും. ഇവയുടെ ഗില്ലുകൾ മഞ്ഞയും, കണ്ണുകൾ കറുപ്പു നിറം കൂടിയതുമാണ്. ആൺ മത്സ്യങ്ങൾ വലിപ്പം കൂടിയവയും പെൺ മത്സ്യങ്ങളെയപേക്ഷിച്ച് വളരെ വേഗത്തിൽ വളരുന്നവയുമാണ്. പെൺ മത്സ്യത്തിന്റെ ശരീരത്തിലെ കുറുകെയുള്ള വരകൾ കൂടുതൽ തെളിഞ്ഞുകാണും.

ഭക്ഷണരീതി

തിലാപ്പിയ മത്സ്യത്തിന്റെ പ്രധാന ഭക്ഷണം ശൈവാലങ്ങളാണ്. ആവശ്യത്തിന് ഏകകോശസസ്യങ്ങളും പായലുകളും മറ്റു ശൈവാലങ്ങളും ലഭ്യമാകാത്ത സാഹചര്യത്തിൽ ഇവ മറ്റു മത്സ്യങ്ങളുടെ ലാർവകൾ, ജലപ്രാണികൾ, ചെറിയ കവചിത ജന്തുക്കൾ തുടങ്ങിയവയെ ഭക്ഷിക്കുന്നു. വളർത്തുന്ന തിലാപ്പിയകൾക്ക് അസോള, തവിട്, പിണ്ണാക്ക്, ധാന്യപ്പൊടി, അരിഞ്ഞ ഇലകൾ, അടുക്കളയിലെ അവശിഷ്ടങ്ങൾ തുടങ്ങിയവ ആഹാരമായി നല്കിവരുന്നു.

പ്രജനനം

രണ്ടോ മൂന്നോ മാസം പ്രായമാകുമ്പോൾ മുതൽ തിലാപ്പിയകൾ മുട്ടയിടാൻ തുടങ്ങും. ഒരു പെൺ മത്സ്യം വർഷത്തിൽ 10-15 പ്രാവശ്യം മുട്ടകളിടുന്നു. ഇവയുടെ മുട്ടകൾക്ക് 0.7 മില്ലിമീറ്റർ വ്യാസമുണ്ട്. ബീജസങ്കലനം നടന്ന മുട്ടകൾ പെൺമത്സ്യം വായിലാക്കുന്നു. മൂന്നു മുതൽ അഞ്ചുവരെ ദിവസങ്ങൾക്കകം മുട്ടകൾ വിരിയും. പെൺ മത്സ്യത്തിന്റെ വായിൽ നിന്ന് ഇര തേടാനും മറ്റും പുറത്തിറങ്ങുന്ന കുഞ്ഞുങ്ങൾ ഭയം തോന്നിയാലുടനെ തിരിച്ച് വായിൽ തന്നെ കയറി ഒളിക്കുന്നു. ഒരിക്കൽ വിത്തിറക്കിയാൽ തിലാപ്പിയ സ്വയം കുഞ്ഞുങ്ങളെ മുട്ടയിട്ട് വളർത്തുന്നതുകൊണ്ട് പിന്നീട് വിത്തിറക്കേണ്ടതായി വരുന്നില്ല.

ലവണാംശം കൂടിയ സമുദ്രജലത്തിൽപ്പോലും തിലാപ്പിയ പ്രജനനം നടത്താറുണ്ട്. ശുദ്ധജലത്തിൽ വളരുന്ന തിലാപ്പിയയുടെ മുട്ടകൾക്ക് മഞ്ഞനിറവും സമുദ്രജലത്തിലുള്ളവയുടേതിന് വെളുത്ത നിറവും ആയിരിക്കും. പെൺ മത്സ്യത്തിന്റെ വലിപ്പഭേദമനുസരിച്ച് മുട്ടകളുടെ എണ്ണത്തിലും വ്യത്യാസമുണ്ടായിരിക്കും. 100-120 മില്ലിമീറ്റർ വലിപ്പമുള്ള പെൺമത്സ്യങ്ങൾ 250 വരെയും 200-220 മില്ലിമീറ്റർ വലിപ്പമുള്ളവ ശരാശരി 900 വരെയും മുട്ടകളിടുന്നു.

അതിജീവനം

മികച്ച രോഗ പ്രതിരോധ ശേഷിയുള്ള മത്സ്യമാണ് തിലാപ്പിയ. വെള്ളത്തിന്റെ താപനില മാറിയാലും, ഓക്സിജന്റെ അളവ് കുറഞ്ഞാലും, അമോണിയയുടെ അളവ് കൂടിയാലും തിലാപ്പിയ അതൊക്കെ അതിജീവിക്കും. ഇവ എളുപ്പത്തിൽ വളർച്ചയെത്തും.

വളർച്ചാനിരക്ക്

തിലാപ്പിയ നല്ലൊരു വളർത്തു മത്സ്യമാണ്. വളർത്തു കുളങ്ങളിൽ അമിതമായി പെരുകുന്നത് ഇവയുടെ വളർച്ചാനിരക്ക് കുറയ് ക്കാനിടയാക്കുന്നു. അതിനാൽ വലിപ്പം കൂടിയവയെ മാറ്റി എണ്ണം കുറയ്ക്കുകയാണു പതിവ്. തിലാപ്പിയയോടൊപ്പം അതിന്റെ കുഞ്ഞുങ്ങളെ ഭക്ഷിക്കുന്ന മത്സ്യങ്ങളെ വളർത്തിയും പെരുപ്പം നിയന്ത്രിക്കാനാകും. ഇതിനായി വാകവരാൽ, വരാൽ, നരിമീൻ തുടങ്ങിയ മത്സ്യങ്ങളെ തിലാപ്പിയയ്ക്കൊപ്പം വളർത്തുന്നു. 35 മില്ലിമീറ്റർ വളർച്ചയെത്തുന്ന കുഞ്ഞുങ്ങളെ ലിംഗനിർണയം നടത്തി ആൺ പെൺ മത്സ്യങ്ങളെ വേർതിരിച്ച് വളർത്തിയും പെരുപ്പം നിയന്ത്രിക്കാം. ആൺമത്സ്യങ്ങൾ വേഗത്തിൽ വളരുന്നതിനാൽ ധാരാളം വലിപ്പം കൂടിയവയെ ലഭിക്കുകയും ചെയ്യും. സങ്കരവർഗത്തെയുത്പാദിപ്പിച്ചും പെരുപ്പം നിയന്ത്രിക്കാവുന്നതാണ്.

കടപ്പാട്: കേരള സർക്കാർ ഗ്നൂ സ്വതന്ത്ര പ്രസിദ്ധീകരണാനുമതി പ്രകാരം ഓൺലൈനിൽ പ്രസിദ്ധീകരിച്ച മലയാളം സർ‌വ്വവിജ്ഞാനകോശത്തിലെ തിലാപ്പിയ എന്ന ലേഖനത്തിന്റെ ഉള്ളടക്കം ഈ ലേഖനത്തിൽ ഉപയോഗിക്കുന്നുണ്ട്. വിക്കിപീഡിയയിലേക്ക് പകർത്തിയതിന് ശേഷം പ്രസ്തുത ഉള്ളടക്കത്തിന് സാരമായ മാറ്റങ്ങൾ വന്നിട്ടുണ്ടാകാം.